Eu n'ha grond plaschair da bivgnantar a visitadurs ed expositurs a l'EBexpo 2023. L'ultim'exposiziun regiunala EBexpo ha gnü lö da prümavaira 2018. Daspö quella jada s'ha müdà il muond e nüglia nun es plü co chi d'eira üna jada. Uossa sun tuot oters temas d'importanza. Adonta da la pandemia, da la guerra in Europa, da la crisa d'energia e da la mancanza da persunal qualifichà, sun noss affars da commerzi e mansteranza - cun paccas excepziuns - gnüts bain sur las rundas. Illa branscha da fabrica cun tuot ils affars affiliats es la situaziun dafatta fich buna.

Daspö l'ultim'exposiziun han diversas dittas fat ün müdamaint da generaziun e nouvs affars sun gnüts nanprò. La digitalisaziun, nouvas maschinas teconologicas ed apparats moderns han müdà il purtret dals mansters. Perquai esa uossa il dret mumaint per preschantar la modernisaziun da noss affars illa regiun in occasiun da l'exposiziun a Scuol.

Expositurs chi spordschan plazzas da giarsunadi sun remarchats specialmaing e las respunsablas ed ils respunsabels da quists affars infuormeschan cun plaschair a scolaras e scolars, respectivamaing a giuvenils a reguard ils differents mansters. Pro'l stand da l'Uffizi chantunal pella fuormaziun professiunala as survain infuormaziuns implü, per exaimpel eir sur da las pussibiltats da perfecziunamaint in Grischun.

Sainza il sustegn dals cumüns da nossa regiun, da la Corporaziun Energia Engiadina, da tuot ils sponsurs, donaturs ed agüdonts, nu füssa pussibel da manar tras quist exposiziun regiunala.

Grazcha fichun pel sustegn generus!

Quista jada as chatta tuot las infuormaziuns a reguard l'EBexpo eir sül telefonin. Simplamaing arcunar la pagina correspundenta sco app sül telefonin e fingià as survain tuot las infuormaziuns a reguard ils expositurs, il plan da situaziun, o il program da trategnimaint. (Instrucziuns per installar l'app as survain sün www.hgv-unterengadin.ch)

Charas visitaduras, chars visitadurs, nus giavüschain bleras bellas uras cun blers inscunters interessants a noss'exposiziun.

Grazcha fich per Vossa visita!

Richard à Porta, president da la Società da commerzi e mansteranza Engiadina Bassa